هەر ببارە، داکە سەریانجگەرگۆشەی سەوزی پەمۆ…
بێهوودەیە
نە خوڕرەی خوێن تێریان دەکا
نە رێژنەی تۆ…
ئەوان خەرەندی بێ بن و
کەند و لەندی شۆرەکاتن…
هەر تێیانکە، پڕنابنەوە
دەمیان بەشە
وەکچۆن بەشبوو هەرکە هاتن…
لەو رۆژەوە تۆ دەباریت
میمبەر نەما دەمی نەگری و
ڵاڵی نەکەی..
سەنگەر نەما
خۆتی تێدا خاڵی نەکەی…
هەڵۆ نەما
لووتکەکانی پێ بەرنەدەی…
قەلەم نەما
ئاودەستخانەی پێ دەرنەدەی…
لەو رۆژەوە تۆ دەباریت
دیواندڕی دەمهار نەما
لە ئوتێلی پێنج ئەستێرە نەیغارێنی…
چۆڕێک ئاوی ڕۆشن نەما پێی نەوەڕی
مژێک هەوای سازگار نەما نەیتارێنی…
گوتم نەرمی، پەمۆزادەی
کەچی هاتی
شاخت بە خوێنی شاخ چەش کرد
گوتم کەسکی وەک گیا سادەی
کەچی هاتی
زەوی و ئاسمان
سەر و بنی دنیات رەش کرد
تۆ بالۆرە و سیاچەمانە و
دەیدەی زەردەی باڵدارت کوشت…
بۆنی چرووی سەرقەرتاڵە و
گیزە گیزی سەماوەری دەشت و دەری
بەهارت کوشت…
تۆ بازرەقەی سوێسکە و پۆڕی قەلی چیا و
بازبازێنی کارمامزی بنارت کوشت…
تۆچیت نەکرد
تۆ مێگەل و بەردەبێر و گاڕانت برد بە گردەوە
قاڕە و باڕەت لەبیر کۆز و
شیناوەردت لەبیر کێڵگە و
ترێت لەبیر رەز بردەوە…
تۆ چیت نەکرد
تۆ غەزەبی ئاسمانان بووی داباریت و
دەمی هەوری خۆت گەیاندە بنج و بنیا…
کۆت و بەندت کردە لینگی شلکە چەمی زمانی مات،
شاڵ و شەپکت لەبەر بەژنی لاوک داکەند
بۆ لاکخۆران
پارچە پارچە، تیکە تیکە
هەڵتخستم لەسەر تەناف…
تۆ حەمرینت بۆ لم راخست
تۆ قەراجت بردە پشت قاف…
تۆ چیت نەکرد
تۆ دڵدارت گۆڕبەدەر کرد
تۆ چاوساغی شەیتانان بووی
بۆ وڵاتی شۆڕەسوار و پەریزادان..
ئەی بێ شەڕەف
تۆ شەڕەفت کرد بە دەفتەر
مەفتەنت کرد بە دۆشەگی بن گەوادان.
هیچ نظری موجود نیست:
ارسال یک نظر