ئاوێنە: بەپێی ئەو پرۆژە یاسایە دەسەڵاتەكانی سەرۆكایەتی هەرێم تا هەڵبژاردنەكانی سەرۆكایەتی هەرێم و خولی پێنجەمی پەرلەمانی كوردستان بەسەر دامەزراوە گشتییەكانی هەرێمدا دابەشدەكرێن. بەپێی پرۆژە یاساكە ئەو دەسەڵاتانەی سەرۆكایەتی هەرێم دەدرێنە سەرۆكی ئەنجومەنی وەزیران، دەستەی سەرۆكایەتی پەرلەمان، سەرۆكی ئەنجومەنی دادوەری. بڕیارە پەرلەمانی كوردستان ئەمڕۆ(یەكشەممە) كۆببێتەوە و تاوتوێی ئەم پرۆژە یاسایە بكات.
ده‌قی پڕۆژه یاساكه:
ماددەی یەكەم:
دەسەڵاتەكانی سەرۆكایەتی هەرێم تا هەڵبژاردنەكانی سەرۆكی هەرێم و خولی پێنجەمی پەرلەمانی كوردستان بەسەر دامەزراوە گشتیەكانی هەرێم دابەشدەكرێن بەم شێوەیە:
یەكەم: پیادەكردنی ئەرك و دەسەڵاتەكانی هاتوو لە حوكمی ماددەكانی یەكەم و دووەم-ەوە هەروەها بڕگەکانی (دوو، شەش، یازدە، پازدە، هەژدە، نزدە) لەماددەی دەیەم لەیاسای سەرۆكایەتی هەرێمی كوردستان- عێراق ژمارە (1)ی ساڵی 2005 هەمواركراو لەلایەن سەرۆكی ئەنجومەنی وەزیرانی دەبێت.
دووەم: پیادەكردنی ئەرك و دەسەڵاتەكانی هاتوو لە بڕگەمانی (سێ، چوار، پێنج، حەوت، هەشت، هەڤدە) لە ماددەی دەیەم لەیاسای سەرۆكایەتی هەرێمی كوردستان- -عێراق ژمارە (1)ی ساڵی 2005 هەمواركراو لە لایەن سەرۆكایەتی ئەنجومەنی وەزیران دەبێت.
سێیەم: پیادەكردنی ئەرك و دەسەڵاتەكانی هاتوو لە بڕگەكانی (یەكەم/2، چواردە) لەماددەی دەیەم لە یاسای سەرۆكایەتی هەرێم كوردستان-عێراق ژمارە (1)ی ساڵی 2005 هەمواركراو لەلایەن دەستەی سەرۆكایەتی پەرلەمانی دەبێت.
چوارەم: پیادەكردنی ئەرك و دەسەڵاتەكانی هاتوو لە بڕگەكانی (دوازدە، سیازدە، شازدە) لە ماددەی دەیەم لە یاسای سەرۆكایەتی هەرێمی كوردستان-عێراق ژمارە (1)ی ساڵی 2005 هەمواركراو لەلایەن سەرۆكی ئەنجومەنی دادوەر دەبێت.
ماددەی دووەم:
دیوانی سەرۆكایەتی هەرێم لەكارو ئەركەكانی بەردەوام دەبێت.
ماددەی سێیەم:
یەكەم: كاركردن بەیاسای سەرۆكایەتی هەرێمی كوردستان-عێراق ژمارە (1)ی ساڵی 2005 هەمواركراو رادەگرێت تا هەڵبژاردنەكانی سەرۆكایەتی هەرێم و خولی پێنجەمی پەرلەمانی كوردستان.
دووەم: ئەم یاسایە بەركاردەبێت تا هەڵبژاردنەكانی سەرۆكی هەرێم و خولی پێنجەمی پەرلەمانی كوردستان.
ماددەی چوارەم:
كاربەهیچ دەقێكی یاسایی یان بڕیارێك ناكرێت كە پێچەوانەی ئەحكامەكانی ئەم یاسایە بێت.
ماددەی پێنجەم:
ئەم یاسایە لەماوەی (10) رۆژ لە بەروای پەسەندكردنی لەلایەن دەستەی سەرۆكایەتی پەرلەمانەوە دەردەچوێندرێت و لەرۆژی دەرچونیەوە جێبەجێ دەكرێت، لەرۆژنامەی فەرمی وەقاعیقی كوردستان بڵاودەكرێتەوە.
هۆیەكانی دەرچواندن
بەهۆی درێژكردنەوەی ماوەی یاسایی خولی چوارەمی پەرلەمانی كوردستان و رەتكردنەوەی سەرۆكی هەرێمی كوردستان بۆ بەردەوامبونی لەپۆستەكەیدا، بەپێی ئەوەی لە مادەی 4 لە یاسای سەرۆكایەتی هەرێمی كوردستان-عێراق ژمارە 1ی ساڵی 2005ی هەمواركراودا هاتوە كە دەنگدان بۆ هەڵبژاردنی سەرۆكی هەرێم لەكات و ساتی هەڵبژاردنی پەرلەمانی كوردستان ئەنجام دەدرێت و لەبەر نەبونی كاندید بۆ پۆستی سەرۆكی هەرێم و بەمەبەستی دروست نەبونی بۆشایی یاسایی لەدەسەڵاتەكانی سەرۆكی هەرێم، ئەم یاسایە دەركرا.
هیچ نظری موجود نیست:
ارسال یک نظر